Miquel Martí Freixas izango da Punto de Vista Jaialdiaren zuzendari artistiko berria 2026-2029 aldian

2025/11/19

Iruña, azaroak 18. Punto de Vista Nafarroako Zinema Dokumentaleko Nazioarteko Jaialdiak bere historiako seigarren zuzendari artistikoaren berri eman du gaur. Ekitaldia, Nafarroako Gobernuak 2005ean sortu zuena eta NICDOk antolatu zuena, Kultura Zuzendaritza Nagusiaren programa artistiko bat da, nazioartean garrantzi handiena dutenetako bat.

Hasieratik, egitura duala izan du; alde batetik, zuzendaritza exekutiboa dago, proiektuaren kudeaketa integralaz arduratzen dena eta 2018az geroztik Teresa Morales de Álavak egiten duen lana. Bestetik, zuzendaritza artistikoa dago, lau urtean behin aldatzen dena. Orain, Miquel Martí Freixas izango da jaialdiko programazioko buru; aurretik, Carlos Muguiro, Josetxo Cerdán, Oskar Alegría, Garbiñe Ortega eta Manuel Asín izan ziren.

 

Lizitaziorako hautagaitzak ebaluatzeko Batzordearen ustez, Martí Freixasen proposamena “kontzeptualki oso ondo eratuta dago, jaialdiaren historiari buruzko azterketaren eta ezagutza oso sakonaren inguruan antolatuta, eta etorkizunari zentzuz eta ausardiaz begiratzen dio, aldaketak egiteko edo jaialdia aberastuko duten eta aurreko taldeek lortutakoari zerbait gehituko dioten proposamen berriak egiteko”.

Miquel Martí Freixasen hitzetan, bere proiektuaren helburua da "egungo zinema-hizkuntza liluragarriei buruzko azterketa egitea, Punto de Vista jaialdiaren herentzia baliotsua hurrengo etapara arte eramango duten bide, esperientzia eta aurkikuntzen mapa askotarikoa eskaintzeko, eta, horrela, ikusleak jaialdi iradokitzaile, harrigarri eta atsegin batera gonbidatzeko".

Miquel Martí Freixas (Bartzelona, 1978) zinema-programatzailea, irakaslea, kultura-kudeatzailea eta kritikaria da. Rotterdamgo Nazioarteko Zinema Jaialdiko programatzailea eta La Inesperada zinema-jaialdiaren sortzaileetako bat izan da; hainbat jaialdi eta erakundetan ere aritu da programatzaile-lanetan, honako hauetan, adibidez: DocumentaMadrid, Filmoteca de Catalunya, États généraux du film documentaire Lussas, ZINEBI, MajorDocs, Curtocircuito eta Mostra Front; epaimahaikide izan da jaialdi ugaritan, hala nola Malagako jaialdian eta RID Montreal, DocLisboa eta Play-Doc Tui jaialdietan. Zumzeig Cinema kooperatibaren sortzaileetako bat izan zen; horretaz gain, ziklo ugari ekoitzi zituen zinema-areto horretarako. Irakasle-lanetan aritu da ESCAC Eskolan eta unibertsitate, master eta zinema-eskola askotan (UAB, Tecnocampus, UPF); kritikaren esparruan, fikziozkoa ez den zineman espezializatutako Blogs&Docs aldizkariaren sortzaileetako bat eta argitaratzailea izan zen (2006-2013).

Zuzendaritza artistikoa berriarekin batera, Hautaketa Batzorde berria ere aurkeztu da gaur. Batzorde hori hiru emakumek eta gizon batek eratzen dute. Inés Calero, Ekhiñe Etxeberria, Antonio Miguel Arenas eta Margot Mecca dira; era askotako esperientziak dituzten eta programazioaren, kritikaren, ikerketaren eta sorkuntzaren esparruetakoak diren lau profesional horiek eta Miquel Martí Freixasek proposatuko dituzte jaialdi honetako Atal Ofiziala osatuko duten filmak 2026-2029 aldian.

Talde berriak eta zuzendaritza exekutiboak elkarrekin lan egingo dute Punto de Vista jaialdiaren hurrengo edizioa prestatzeko. Edizio hori apirilaren 20tik 25era izango da eta jaialdiaren sorreraren hogeigarren edizioa ospatuko du.

***

INÉS CALERO

Bere interesak narratiben, autofikzioaren eta niaren filmografien arteko nahasketan oinarritzen dira. Kazetaritzan graduatu zen Valentziako Unibertsitatean, dokumentaleko eta erreportaje transmediako masterra egin zuen (UC3M); eta zinema-komisariotzan espezializatu zen Elías Querejeta Zine Eskolan. Laura Garcíarekin batera, Docs&Talks fikziozkoa ez den zinema aztertzen duen podcastaren sortzaileetako bat da. 

Dirdira Lab laborategiarekin (2022-2023) eta RAW:Arché →Work programarekin (2024) elkarlanean aritu da. Donostiako Nazioarteko Zinemaldian (SSIFF) eta Dock of the Bay eta Animalcoi jaialdietan lan egin du. Tabakaleran eta Azkuna Zentroan ere aritu da programatzen beste batzuekin batera. Gaur egun, Marta Guillénen opera prima Una thermomix en el desierto ekoitzi du.

 

EKHIÑE ETXEBERRIA

Ekhiñe Etxeberria Garjón Nafarroan kokatutako programatzailea, zinemagilea eta komisarioa da. Zinematografia (Dokumentala espezialitatea) ikasi zuen Kataluniako Escola de Cinema i Audiovisuals Eskolan (ESCAC) eta Komisariotza Zinematografikoa eta Ikus-entzunezkoa Elías Querejeta Zine Eskolan. Egiten duen kuradoretza-lana kultura-bitartekaritzara, memoria kolektibora eta lurraldearen, generoaren eta zinemaren arteko elkarrizketara bideratzen da, ikuspegi kritiko eta kokatutik begiratuta. Gaur egun, Uharte Arte Garaikideko Zentroko prestakuntza-koordinatzailea izateaz gain, kuradoretza-lana ere egiten du.

 

ANTONIO MIGUEL ARENAS

Zinemagilea. Magnolia aldizkariaren sortzaileetako bat izan zen. Aldizkari hori zinema-kritikari eta -azterketari buruzko online argitalpena da. Punto de Vista jaialdiaren prentsa-bulegoko kide izan zen 2016. eta 2017. urteetan. 2018an, komisariotzako graduondokoa egin zuen Donostiako Elías Querejeta Zine Eskolan. 2021. urteaz geroztik, Granadako Festival Jóvenes Realizadores jaialdiaren zuzendari artistikoa izan zen eta hamar urte daramatza jaialdi horri lotuta. Topo estrellado (2023) film laburra zuzendu du, Granadako José Guerrero Zentroak komisariatuta. Gaur egun, ECAM Eskolaren La Distribuidora banaketa-etxearen koordinatzaile da eta Eskola horretako irakasle da.

 

MARGOT MECCA

Bartzelonan kokatuta dagoen programatzaile, ekoizle eta ikertzaile italiarra. Bartzelonako Unibertsitate Autonomoko doktorea, 2019tik 2023ra doktoratu ondoko ikertzailea izan da UPFko Komunikazio Sailean. 2011z geroztik, Festival dei Popoli jaialdiaren lantaldeko kide da; jaialdi horretako industria-plataforma zuzentzen du eta hautaketa-batzordeko kide da. Hainbat jaialdiren programazioan eta jarduera profesionaletan lagundu du (FIDMarseille, Visions du Réel, Majordocs, +RAINFilm Festival, La Inesperada). Bere filmografiari dagokionez, Mother Lode (2021) eta Monte Tropic (2023) film luzeak eta Le prime volte (2025) film laburra ekoitzi ditu.